A Cámara reanuda esta semana as xornadas de emprendemento cooperativo no ámbito educativo con dúas visitas ao viveiro de estudantes do Colexio Alca de Ames e do instituto Xelmírez II de Santiago

Celebrarase tamén unha xornada divulgativa no IES Xulián Magariños de Negreira

Organízanse co apoio da Xunta de Galicia, no marco da Rede Eusumo 

A Cámara de Comercio, Industria, Servizos e Navegación de Santiago de Compostela organizará esta semana dúas visitas ao viveiro de empresas de Costa Vella e unha charla divulgativa nun centro de ensino da demarcación sobre fomento do espírito emprededor cooperativo, cofinanciadas pola Xunta de Galicia no marco da Rede Eusumo.

O obxecto das charlas é contribuír ao desenvolvemento das calidades persoais relacionadas co emprendedor desde idades temperás; fomentar as iniciativas emprendedoras desde o ámbito educativo; e informar, sensibilizar e transmitir a opción do autoemprego como una alternativa laboral digna e viable. Ademais, as xornadas están destinadas a transmitir valores empresariais e cooperativos vinculados á economía social, e dar a coñecer as cooperativas e sociedades laborais como formas xurídicas idóneas para a posta en marcha e desenvolvemento de proxectos empresariais. O persoal técnico da Cámara de Comercio impartirá as charlas divulgativas nos centros escolares e dirixirá as visitas ao viveiro de empresas cameral, situado no número 40 do Polígono de Costa Vella.

Un grupo de vinte e tres alumnos de 4º da ESO do Colexio Alca de Ames visitará mañá mércores, día 19, as instalacións da incubadora empresarial ás 11:30 horas. O xoves 20 coñecerá o viveiro de Costa Vella un grupo de alumnos de 4º da ESO do IES Xelmírez II de Santiago, ás 10:00 horas.  O emprendedor Javier Herranz, asentado no viveiro coa empresa Siete Olas, Axencia de Comunicación, ofrecerá unha pequena charla en ambas visitas sobre a súa experiencia emprendedora, comentando os inicios do seu proxecto adicado a potenciar resultados nas empresas mediante o marketing. E o venres 21, un técnico da Cámara desprazarase ao IES Xulián Magariños de Negreira para ofrecer unha charla sobre o emprendemento e o cooperativismo a un grupo de vinte e cinco estudantes do ciclo superior de ASIR e do ciclo medio de actividades comerciais, ás 11:00 horas.