Asistiron noventa persoas que atenderon ás explicacións do experto en marketing e ex director comercial de Begano, José Picado Carballeira

A Cámara de Comercio de Santiago celebrou hoxe un taller de xestión do comercio, titulado “O marketing das grandes marcas aplicado ao comercio minorista”, no que participaron noventa persoas. O obradoiro gratuíto forma parte do Plan do Comercio Minorista, posto en marcha polas Cámaras de España e a Secretaría de Estado de Comercio do Ministerio de Economía con cofinanciamento do Fondo Europeo de Desarrollo Regional (FEDER).

O taller, dirixido a autónomos, microempresas, pemes, empregados e emprendedores do sector comercial minorista, estivo impartido polo consultor e formador en marketing, responsabilidade social corporativa e recursos humanos e ex director comercial de Begano S.A. (Coca Cola), José Picado Carballeira. O experto explicou aos asistentes as técnicas de marketing e como aplicalas nos establecementos comerciais minoristas. Comentáronse casos de éxito, principalmente do sector téxtil e de hostalería, tanto de cadeas como de puntos de venda individuais.