Cáritas Interparroquial de Santiago promove varios actos nas vindeiras datas con motivo da celebración do Día das Persoas Sen Fogar o xoves, 24 de novembro, baixo o lema “Faime visible. Por dignidade. Ninguén sen fogar. Ese día ás 12 da mañá na praza do Obradoiro haberá unha concentración na que o presentador do programa “Luar” da TVG, Xosé Ramón Gayoso, lerá un manifesto. Esa mesma tarde, ás 16 horas, proxectarase na sede da Interparroquial (rúa Hospitaliño, 2) a premiada película estadounidense Invisibles (2014), dirixida por Oren Moverman e protagonizada por Richard Gere. O catedrático de Historia do Cine da Universidade de Santiago, Luis Hueso, presentará a cinta e dirixirá unha charla-coloquio posterior.
Os usuarios do centro de día Vieiro serán protagonistas da concentración matinal, asistirán ao vídeofórum vespertino e son os autores dunha exposición de fotos do seu día a día, cuxo traballo de campo se fixo con cámaras de usar e tirar, que se amosará a semana próxima no claustro da hospedería de San Martiño Pinario, ata o venres día 2, noite en que o Seminario Maior celebra unha cea solidaria.
Celebraranse unhas xornadas de portas abertas esta fin de semana no centro Vieiro, ubicado na rúa Costa Vella,12, en horario ininterrompido de 8 a 19 horas tanto o sábado como o domingo. “Abrimos as nosas portas para acoller aos participantes e á comunidade que queira coñecer o noso labor”, segundo indica o programa. Por este centro pasan máis dun cento de persoas diariamente, onde se lles ofrece orientación psicosocial e laboral, formación, seguimento da saúde e apoio na busca de vivenda, entre outras prestacións.
Responsables e técnicos de Cáritas Interparroquial de Santiago, entidade que dirixe José Antonio Beiroa, informaron destas actividades esta mañá en rolda de prensa, facendo fincapé na necesidade de que se vexa e se atenda ás persoas sen fogar.