Esta iniciativa enmárcase no ciclo “A Escola na Cidade”, actuacións dos futuros músicos en diferentes puntos de Compostela

A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, este luns, 4 de xuño, ás 20:30 horas, os rapaces ofrecerán un concerto no Paraninfo da Universidade de Santiago, na facultade de Xeografía e Historia, acompañados polas pianistas Eriko Ishimoto e Haruna Takebe. En primeiro lugar actuará a oboísta Cecilia Castro, que interpretará o Concerto para óboe de Mozart e Omaggio a Bellini de Antonio Pasculli.

A continuación a viola Carolina Uriz tocará parte do Concerto para viola de Béla Bartók. E a cita concluirá coa intervención do trompetista Francisco Gaspar Tomás, que achegará ao público o Concerto para trompeta, cordas e baixo continuo de Telemann e Sequenza X de Luciano Berio.

Este ciclo de concertos de “A Escola na Cidade” continuará o martes 5 e o mércores 6 con novas actuacións no Paraninfo da Universidade de Santiago, protagonizadas por alumnos do Curso Avanzado de Especialización Orquestral da Escola de Altos Estudos Musicais. E a vindeira semana celebraranse os días 11, 12 e 13.