É profesor do Real Conservatorio Superior de Música de Madrid e da Escuela Superior de Música Reina Sofía
A Escola de Altos Estudos Musicais ofrece a posibilidade de que intérpretes novos melloren a súa destreza con este instrumento
A Escola de Altos Estudos Musicais (EAEM), con sede en Santiago de Compostela, dispón dun programa de formación permanente dirixido a intérpretes novos. No marco deste proxecto, ofrécese a posibilidade de asistir ao longo do ano a unha serie de clases maxistrais que imparten solistas de recoñecido prestixio internacional. A vindeira semana contarase coa presenza do recoñecido violinista ruso Sergei Teslia. Ademais dos alumnos da Escola, tamén poden asistir músicos externos ao centro.
As clases celebraranse o venres 9 de marzo, de 9:00 a 15:00 horas pola mañá e de 16:30 a 20:30 horas pola tarde. Os músicos que desexen participar nestas sesións poderán matricularse a través da páxina web da Escola –www.eaem.es-. Os aspirantes deben estar cursando como mínimo os últimos cursos de grao medio de música.
Sergei Teslia foi violinista principal da Orquesta Sinfónica de Sevilla e da Orquesta Nacional de España
Sergei Teslia naceu na rexión rusa de Siberia. Comezou a estudar violín aos catro anos. Formouse en varios centros de Rusia e Ucraína. Ao longo da súa traxectoria ten recibido numerosos premios en certames de violín en Rusia, Polonia, Francia…
Con “Os Virtuosos de Moscú” participa en múltiples xiras por países de Asia, América do Norte, América do Sur e Europa. Toca en salas tan prestixiosas como o Carnegie Hall de Nova York ou o Albert Hall de Londres. Ten realizado varias gravacións e concertos con solistas de renome como Mstislav Rostropovich, considerado o mellor violoncellista ruso da súa xeración.
Entre os anos 1994 e 2002 foi concertino da Orquesta Sinfónica de Sevilla. En 1998 creou a Orquesta de Cámara de la Real Orquesta Sinfónica de Sevilla, da cal foi director artístico e solista. Entre 2002 e 2011 foi concertino da Orquesta Nacional de España. Na actualidade é profesor de violín do Real Conservatorio Superior de Música de Madrid e da Escuela Superior de Música Reina Sofía.
