Asesorouse entre abril e xuño en habilidades sociais, idiomas e competencias dixitais para a busca de emprego e impartiuse un curso práctico de xestión laboral

A Cámara de Comercio, Industria, Servizos e Navegación de Santiago de Compostela entregou hoxe os diplomas aos 40 alumnos da formación troncal e específica do plan de capacitación do Programa Integral de Cualificación y Empleo (PICE), unha iniciativa integrada no Plan Nacional de Implantación de la Garantía Juvenil do Ministerio de Empleo y Seguridad Social que conta con financiamento do Fondo Social Europeo e da Cámara de Comercio de Santiago. O acto estivo presidido polo presidente da Cámara, Jesús Asorey, o secretario xeral, Fernando Barros, e a técnico de Formación e Emprego, Isabel Garrido.

O programa gratuíto PICE está composto por un conxunto de accións de orientación, formación e achegamento ás empresas que persegue a empregabilidade de mozos e mozas de 16 a 29 anos. Está deseñado a medida do perfil, intereses e grao de cualificación e capacitación dos máis novos e responde á demanda actual das empresas.

Dentro do plan de capacitación do PICE, destinado a ofrecer accións directas de formación, adaptadas ás capacidades e necesidades e ás demandas empresariais para favorecer as posibilidades de inserción laboral de cada participante, celebráronse entre os meses de abril e un cursos de formación troncal e tres de formación específica, todos gratuítos. Ofreceuse orientación en temas de empregabilidade, con información referente a habilidades persoais e sociais, competencias dixitais para a busca de emprego e idiomas.

En relación á formación específica, para o que foi preciso cursar primeiro a formación troncal, organizouse un curso práctico de xestión laboral e administración de persoal con nocións de contratación, nóminas e seguros sociais.