A actuación, que é gratuíta ata completar aforo, comezará ás 20:30 horas

A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, mañá venres, 16 de xuño, ás 20:30 horas, os rapaces ofrecerán un concerto no Paraninfo da Universidade de Santiago, na facultade de Xeografía e Historia. En primeiro lugar actuará a fagotista Azucena Miras, que interpretará o Concerto para fagot en Fa maior de Carl Maria von Weber. Estará acompañada pola pianista Haruna Takebe.

De seguido, a viola Joana Tavares achegará ao público a Sonata nº 2 de Johannes Brahms. E a cita concluirá coa actuación da oboísta Sara Fernández, que achegará ao público o Concerto para óboe en Do maior de Mozart. Ámbalas dúas estarán acompañadas pola pianista Eriko Ishimoto.

Este ciclo de concertos remata mañá venres con esta actuación no Paraninfo da USC, protagonizada por alumnos do Curso Avanzado de Especialización Orquestral da Escola de Altos Estudos Musicais.