A actuación, que é gratuíta ata completar aforo, comezará ás 20:30 horas

A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, mañá xoves, 15 de xuño, ás 20:30 horas, os rapaces ofrecerán un concerto no Paraninfo da Universidade de Santiago, na facultade de Xeografía e Historia, acompañados pola pianista Simona Velikova. En primeiro lugar actuará a violinista Irene Vilanova, que interpretará a Sonata nº 2 de Eugène Ysaÿe e o Concerto para violín en Re maior de Beethoven. De seguido, o percusionista Álvaro Jurado achegará ao público as obras Tchik de Nicolas Matynciow e Ultimatum I de Živković.

A cita concluirá coa actuación da violinista Paloma Diago, que tocará o Concerto para violín nº 1 de Prokófiev.

Este ciclo de concertos remata este venres, cunha nova actuación no Paraninfo da USC, protagonizada por alumnos do Curso Avanzado de Especialización Orquestral da Escola de Altos Estudos Musicais.