Desde a solicitude de participación ata a súa resolución final, todos os trámites poden realizarse por vía telemática a través desta plataforma
A Cámara de Comercio, Industria, Servizos e Navegación de Santiago de Compostela estrea a súa Plataforma de Administración Electrónica para facilitar a empresas e emprendedores o acceso ás axudas dos programas desenvolvidos pola rede de Cámaras de Comercio con cofinanciamento dos fondos europeos. Desde a fase da convocatoria ata a resolución final da axuda, todos os trámites poden realizarse por vía telemática.
Para solicitar unha axuda só son necesarios catro pasos: acceder á Sede Electrónica da Cámara de Comercio de Santiago e consultar as convocatorias abertas a través do buscador ou accedendo ás pestanas de clasificación dos trámites; iniciar a presentación identificándose cun certificado electrónico; completar os datos do solicitante, encher o formulario de solicitude e achegar a documentación requirida; e asinar e presentar o formulario completado antes da data de fin da convocatoria.
Para efectuar a firma é necesario ter instalada a aplicación gratuíta Autofirma facilitada polo Goberno de España, que se pode descargar na seguinte ligazón: http://firmaelectronica.gob.es/Home/Descargas.html
Nun apartado persoal, a empresa pode consultar o estado das súas solicitudes, emendar información ou achegar novos documentos e acceder ás notificacións electrónicas. O acceso a esta área privada realízase mediante certificado dixital, que asegura a privacidade da información e solicitante.
Organismo intermedio de programas europeos
A Cámara de Comercio de Santiago actúa como organismo intermedio dos programas de axudas da Unión Europea. En total, a Cámara de España xestionará ata o ano 2020 máis de 400 millóns de euros, procedentes dos fondos europeos FEDER e FSE. A dixitalización, innovación e internacionalización de pemes, a mellora da empregabilidade da mocidade e o apoio ás mulleres emprendedoras son as principais liñas de apoio das Cámaras de Comercio que contan con cofinanciamento de fondos europeos. Sectores con gran peso na economía española, como son o turismo e o comercio contan con plans específicos cofinanciados tamén con axudas comunitarias.
Estas accións desenvólvense a través de programas como TicCámaras, Innocámaras, Plan de Apoio á Competitividade do Comercio, Plan de Competitividade Turística, Plan Integral de Cualificación e Emprego (PICE), o Programa de Apoio á Muller Empresaria (PAEM), Xpande e Xpande Dixital, deseñados pola Cámara de España e executados a través da rede de cámaras territoriais.
Dispoñibilidade, accesibilidade e aforro de tempo
A través da Sede Electrónica, a tramitación e xestión das convocatorias de axuda destes programas será máis transparente, áxil e eficiente á vez que as empresas e emprendedores terán unha nova canle máis accesible, sinxela e con maior dispoñibilidade para solicitar as axudas. As xestións poderanse realizar desde calquera lugar e en calquera momento sen necesidade de desprazarse a unha oficina presencial. A identidade, integridade e privacidade do proceso está garantido polo acceso con certificado dixital e uso de firma electrónica e canle segura.
Acceso á sede electrónica: https://sede.camara.es/sede/santiago-compostela
Acceso ao vídeo tutorial: https://www.camara.es/blog/innovacion-y-competitividad/nueva-sede-electronica-estamos-mas-cerca-de-ti
