As perspectivas son mellores que as das compañías españolas en vendas nacionais e emprego
Eurocámaras elaborou unha enquisa das perspectivas empresariais, baseada nas vendas nacionais, exportacións, emprego e investimento
As empresas galegas son máis optimistas que as do conxunto da Unión Europea de cara a 2017, segundo os resultados da Enquisa de Perspectivas Empresariais, elaborada o pasado mes de setembro por Eurocámaras. En total participaron máis de 50.000 empresas europeas, das que 3.000 son españolas e 201 galegas, e analizouse a situación e expectativas dunha serie de variables de interese para os seus negocios, como son as vendas nacionais, exportacións, emprego e investimento.
As expectativas das empresas galegas para 2017 son favorables. Todas as variables analizadas teñen saldos positivos, o que indica que a porcentaxe de empresas optimistas é superior ao de pesimistas. Nunha comparativa, as perspectivas das empresas de Galicia son mellores que as do conxunto de España no que se refire a vendas nacionais e emprego, e lixeiramente inferiores en canto a exportacións e investimento. Respecto das empresas europeas, as galegas son máis optimistas en todas as variables analizadas.
Vendas nacionais e exportacións
As empresas galegas esperan un comportamento favorable das súas vendas en territorio nacional durante 2017 (48% de empresas prevé incrementalas respecto das de 2016). Estas expectativas son lixeiramente mellores ás do conxunto das empresas españolas (o 47% das empresas en España ten en perspectiva incrementar a facturación en territorio nacional), e sensiblemente superiores ás das empresas europeas (onde un 34% prevé incrementar as vendas nos seus respectivos países en 2017). No ano 2016, un 59% das compañías de Galicia incrementaron as súas vendas nacionais, porcentaxe moi elevada se se compara coa media das empresas españolas e europeas (49% e 32%, respectivamente).
Por outra banda, as expectativas que teñen as empresas de Galicia no que se refire a exportacións para 2017 son positivas, aínda que inferiores ás rexistradas no conxunto de España. A porcentaxe de empresas exportadoras galegas que prevé incrementar as súas vendas ao exterior é do 45%, fronte ao 55% de empresas do mesmo tipo que espera unha evolución similar en España. Con respecto ás empresas europeas, as expectativas das empresas galegas son mellores (só o 37% das empresas europeas prevé incrementar as súas exportacións en 2017). En 2016 as empresas de Galicia mostraron un comportamento positivo, mellor que a media europea, aínda que lixeiramente máis moderado que o do conxunto das empresas españolas.
Emprego e investimento
O 37% das empresas de Galicia espera aumentar o número de empregados en plantilla durante 2017. No conxunto de España, o 31% das empresas prevé incrementar o número de traballadores e entre as empresas europeas esta porcentaxe sitúase no 23%. Con respecto ao resultado de 2016, disminúe a porcentaxe de empresas galegas que teñen en expectativa de aumentar a plantilla (37% en 2017 fronte ao 48% das empresas que o fixeron en 2016), pero por outro lado increméntase a porcentaxe de aquelas empresas que prevé manter o emprego (53% espera manter a plantilla en 2017 fronte ao 42% que afirma telo feito en 2016).
En canto ao investimento, o 39% das compañías de Galicia considera que en 2017 incrementará esta partida. A porcentaxe é inferior á rexistrada para o conxunto de España, aínda que superior á da media europea, onde o 41% e o 30% das empresas, respectivamente, espera incrementar o investimento en 2017. Hai que destacar tamén que existe unha porcentaxe significativa de empresas galegas que espera manter as sáus partidas de investimento en 2017. En xeral, o 91% das empresas de Galicia espera incrementar ou manter o seu investimento, polo 91% das do conxunto de España e o 87% das da UE.
Condicionantes da actividade empresarial
En 2016, os principais condicionantes da actividade para as compañías de Galicia foron lixeiramente distintos aos que afirmaron ter as empresas do conxunto de España. Demanda nacional, medidas de política económica e custos laborais foron os factores máis importantes que afectaron á actividade das empresas galegas, mentres que para o conxunto de empresas españolas, as medidas de política económica tiveron unha importancia sensiblemente menor. Tamén é destacable a importacia que teñen as condicións de financiamento para as empresas galegas, como elemento que limita a actividade, sensiblemente por encima do peso que outorgan a este factor o conxunto das empresas españolas.
Para 2017, novamente a demanda nacional, as medidas de política económica e os custos laborais serán os factores máis importantes que condicionen a actividade das empresas de Galicia. As condicións de financiamento será o cuarto elemento en importancia. O impacto do Brexit na actividade das empresas galegas será moi limitado. Menos do 5% das empresas de Galicia sinalaron o factor.
