Terán preferencia as obras destinadas a mellorar a accesibilidade e tamén se primará a apertura de novos locais actualmente sen uso

No marco do “Programa Localízate”, o Consorcio de Santiago vai destinar este ano 100.000 euros en axudas para mellorar a accesibilidade, a eficiencia enerxética, a imaxe exterior e o acondicionamento interior dos locais comerciais situados no ámbito do Plan Especial de Rehabilitación da Cidade Histórica de Santiago de Compostela. O prazo de presentación de solicitudes remata o vindeiro 17 de outubro. Pablo Tomé é o arquitecto do organismo interadministrativo responsable deste programa.

Estas subvencións enfócanse de maneira prioritaria á realización de obras que melloren a accesibilidade. Ademais, búscase favorecer a redución do consumo enerxético (o que afecta ás instalacións de iluminación, electricidade e acondicionamento de aire), a mellora da imaxe externa e do interior, o acondicionamento acústico e tamén se subvencionan os honorarios de redacción do proxecto e dirección técnica da obra.

Requisitos para acceder ás axudas

Poderán ser beneficiarios destas axudas os usuarios legais dos locais, tanto persoas físicas como xurídicas, e actúen como propietarios, arrendatarios ou que ostenten algún dereito de uso sobre eles. En canto aos locais, deberán reunir as condicións suficientes de seguridade estrutural e estanquidade fronte á choiva, o edificio no que se localice o establecemento deberá ter unha antigüidade superior aos 20 anos. Deberán estar nunha planta baixa, semisoto ou primeiro soto ou en plantas altas se están vencelladas co local da planta baixa. Ademais, terán que contar con fachada á vía pública.

En canto á avaliación das solicitudes, darase preferencia á mellora da accesibilidade do local Tamén se primará a redución do consumo enerxético e a mellora da súa imaxe exterior, así como a apertura de novos locais actualmente sen uso. Respecto á actividade da empresa, valorarase a súa repercusión no desenvolvemento do tecido económico local. O orzamento mínimo subvencionable será de 3.000 euros e o máximo de 30.000 €. A contía da axuda acadará o 40 % do orzamento aceptado.

As solicitudes e a documentación poderán presentarse no rexistro do Consorcio, situado no número 59 da Rúa do Vilar, ou en calquera outro rexistro.

Vinte anos traballando pola mellora dos locais comerciais da cidade histórica de Santiago

O Consorcio impulsou o seu primeiro Programa de Rehabilitación de Locais Comerciais da Cidade Histórica de Santiago fai agora vinte anos. O denominado B 96 sentou as bases desta liña de traballo, liderada dende os seus inicios polo arquitecto Pablo Tomé. O arquitecto salienta que “a mellora da accesibilidade é o motivo fundamental deste novo Programa Localízate, de xeito que se facilite a adecuación dos locais comerciais á normativa de accesibilidade promulgada pola Xunta de Galicia en 2014”.

Na cidade histórica de Santiago hai na actualidade preto de 2.300 locais comerciais, dos cales uns 700 están sen actividade. Así, unha das prioridades deste novo programa é, xunto á mellora da accesibilidade, a posta en uso deses locais.

En programas anteriores promovidos polo Consorcio estudáronse preto de 600 locais comerciais. Destes, case a terceira parte levaron a cabo algún tipo de reforma vencellada á mellora da imaxe exterior ou no espazo interior, mellora das instalacións, da seguridade ou do illamento acústico.