A entrada desta actuación é gratuíta ata completar aforo

A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, mañá martes, 24 de maio, ás 20:30 horas, os rapaces ofrecerán un concerto no Paraninfo da Universidade de Santiago, na facultade de Xeografía e Historia, acompañados pola pianista Simona Velikova. En primeiro lugar actuará o violinista Jorge Galán, que interpretará o Concerto para violín nº 5 de Mozart e o Concerto para violín nº 3 de Saint-Saens.

A continuación a violista Nehir Akansu tocará o Concerto para viola “Der Schwanendreher” de Hindemith. E a cita concluirá coa intervención da oboísta Carolina Rodríguez, que achegará ao público o Concerto para óboe en Fa maior de Bach e a obra Cinq pieces pour le hautbois de Dorati.