Esta iniciativa enmárcase no ciclo “A Escola na Cidade”, actuacións dos futuros músicos en diferentes puntos de Compostela

A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, este luns, 23 de maio, ás 20:30 horas, os rapaces ofrecerán un concerto no Paraninfo da Universidade de Santiago, na facultade de Xeografía e Historia, acompañados pola pianista Simona Velikova. En primeiro lugar actuará a frautista Laia Albinyana, que interpretará a Sonata en Mi maior para fratuta e baixo continuo de Bach, a Sonata appassionata de Elert e a Balade para frauta e piano de Frank Martin.

A continuación a violinista Aida López tocará o Concerto para violín nº 5 en La maior de Mozart e o Concerto en Re menor de Sibelius. E a cita concluirá coa intervención do violinista César Sánchez, que achegará ao público o Concerto para violín nº 5 de Mozart, o Concerto para violín en Mi menor de Mendelssohn e a obra Zingeunerweisen do compositor español Pablo de Sarasate.

Este ciclo de concertos de “A Escola na Cidade” continuará o vindeiro martes día 24 e o mércores 25, ademais dos días 6, 7 e 8 de xuño con novas actuacións no Paraninfo da Universidade de Santiago, protagonizadas por alumnos do Curso Avanzado de Especialización Orquestral da Escola de Altos Estudos Musicais.