O músico italiano Marco Caratto, fagot principal da Orquestra Sinfónica de Euskadi, formará a músicos galegos

A Escola de Altos Estudos Musicais ofrece sete prazas para intérpretes novos  

A Escola de Altos Estudos Musicais (EAEM), con sede en Santiago de Compostela, dispón dun programa de formación permanente dirixido a intérpretes novos. Ao longo do ano ofrécese a posibilidade de asistir a unha serie de clases maxistrais que imparten solistas de prestixio internacional. A vindeira semana o recoñecido músico italiano Marco Caratto dará clases de fagot tanto aos alumnos da escola como a intérpretes externos interesados en mellorar a súa formación con este instrumento.

As clases celebraranse o luns 9 de marzo, de 15:30 a 17:00 e de 17:00 a 20:00 horas. O martes día 10 as sesións terán lugar de 12:00 a 14:00 horas pola mañá e de 16:00 a 18:00 e de 18:00 a 19:30 horas pola tarde. Os músicos externos ao centro que desexen participar poderán matricularse a través da páxina web da Escola -www.eaem.es-. Ofrécense un total de sete prazas.

O músico interpreta o repertorio barroco con instrumentos orixinais da época

Marco Caratto nace na cidade italiana de Alessandria en 1960. Inicia os seus estudos de música no Conservatorio Giuseppe Verdi de Turín, onde se diploma, ao tempo que obtén o título de Maxisterio na súa cidade natal. Logo continúa a súa formación en Suíza, diplomándonse coas máximas cualificacións e Matrícula de Honra.

Dende 1984 é o fagot principal da Orquestra Sinfónica de Euskadi. Toca un fagot Heckel, que empregan os mellores e máis recoñecidos músicos de todo o mundo. Compaxina o traballo orquestral e camerístico co repertorio barroco, que interpreta con instrumentos orixinais da época.