A actuación, que é gratuíta ata completar aforo, comezará ás 20:30 horas

A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, mañá mércores, 13 de xuño, ás 20:30 horas, os rapaces ofrecerán un concerto no Paraninfo da Universidade de Santiago, na facultade de Xeografía e Historia, acompañados pola pianista Haruna Takebe.

En primeiro lugar actuará a percusionista Marta Rodríguez, que interpretará as obras Coena Rudimentalis de Carlos Passeggi, Prism de Keiko Abe, un fragmento de Fertility Rites de Christos Hatzis e The whimsical nature of small particle physics de Ben Wahlund. De seguido, o fagotista Mario Vercher achegará ao público Andante e rondó húngaro de Weber e Ciranda das sete notas de Heitor Villa-Lobos.

A continuación, o violoncellista Jorge Merchán tocará un fragmento do Concerto para violoncello nº 2 de Haydn e parte do Concerto para violoncello de Dvorák, co que concluirá esta cita musical. Ponse así o broche final a este ciclo de actuacións de fin de curso dos alumnos da Escola de Altos Estudos Musicais.