Alumnos da Escola de Altos Estudos Musicais ofrecen mañá luns un novo concerto no Paraninfo da Universidade de Santiago

A actuación, que é gratuíta ata completar aforo, comezará ás 20:30 horas

A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, mañá luns, 11 de xuño, ás 20:30 horas, os rapaces ofrecerán un concerto no Paraninfo da Universidade de Santiago, na facultade de Xeografía e Historia, acompañados pola pianista Eriko Ishimoto.

En primeiro lugar actuará a viola Nuria Honrubia, que interpretará un fragmento da Sonata para arpeggione e piano de Franz Schubert (1797-1828). De seguido, a violoncellista Iratxe Paredes achegará ao público a Sonata para violoncello e piano nº 1 de Johannes Brahms (1833-1897). A continuación o clarinetista Germán Martínez tocará as obras Pezas de fantasía para clarinete e piano de Robert Schumann (1810-1856), Fantasía para clarinete solo do compositor alemán Jörg Widmann (1973) e Première Rhapsodie de Claude Debussy (1862-1918), coa que concluirá esta cita musical.

Este ciclo de concertos continuará con novas actuacións o martes e o mércores no Paraninfo da USC, protagonizadas por alumnos do Curso Avanzado de Especialización Orquestral da Escola de Altos Estudos Musicais.