Tras unha traxectoria de corenta anos, foron recoñecidos co título “RIBA International Fellowship” que concede o Royal Institute of British Architects a arquitectos non británicos
A conferencia “Milagros y fracasos”, incluída no ciclo “Reflexións”, celebrarase o venres 28, ás 19:30 horas
A Delegación de Vigo do Colexio de Arquitectos de Galicia organiza o vindeiro venres, día 28, unha nova conferencia do ciclo de arquitectura “Reflexións”, onde destacados arquitectos de ámbito nacional e internacional se achegan ata a sede viguesa para contar aspectos destacables da súa obra e a súa visión da arquitectura. Nesta ocasión, ofrecerá un relatorio o arquitecto José Antonio Martínez Lapeña do estudio José Antonio Martinez Lapeña & Elías Torres Architects. Co patrocinio de Civisglobal, a conferencia celebrarase ás 19:30 horas na delegación do Colexio (rúa Doutor Cadaval, 5), aberta a todo o público da cidade.
Baixo o título “Milagros y fracasos”, a conferencia centrarase en explicar os proxectos realizados polo estudio desde a súa fundación en 1968. Antonio Martínez Lapeña (Tarragona, 1941) licenciouse na Escola Tècnica Superior de Arquitectura de Barcelona (ETSAB) da Universidade Politécnica de Cataluña (UPC) en 1968, e desde ese mesmo ano formou unha asociación profesional con Elías Torres, formando o estudio José Antonio Martínez Lapeña & Elías Torres Architects. Lapeña é profesor na Escola de Arquitectura do Vallés e desde 1998 na Universidade Ramón Llull.
O estudio leva máis de corenta anos traballando a gran nivel e os profesionais recibiron en febreiro de 2016 o “RIBA International Fellowship”, un dos títulos máis prestixiosos para arquitectos non británicos que concede o Royal Institute of British Architects a aqueles arquitectos que tiveron un impacto significativo ao longo das súas carreiras no mundo da arquitectura.
A lista específica dos proxectos que este equipo de arquitectos emprendeu, tanto públicos como privados, é enorme, e moitos foron galardonados con diversos premios. Entre as obras, destacan o xardín de Villa Cecilia en Barcelona, o hospital de Móra d’Ebre en Tarragona, o complexo habitacional Villa Olímpica de Barcelona, a escaleira mecánica La Granja en Toledo, a restauración do paseo de Ronda nas murallas da cidade de Palma de Mallorca, e a restauración sensible do Parque Güell de Gaudí en Barcelona.
Outros proxectos destacados foron o anexo Museo de Kumamoto en Xapón, polo que recibiron o Premio Belca en Tokio en 1995 ou a explanada de Barcelona Fòrum coa pranta de enerxía fotovoltaica (2004) que gañou o premio especial da Bienal Internacional de Arquitectura de Venecia.