Celebraranse xornadas divulgativas en centros educativos de Ames e Santiago e visitas guiadas ao viveiro de Costa Vella con alumnos de Arzúa e Padrón
A Cámara de Comercio, Industria, Servizos e Navegación de Santiago de Compostela organizará esta semana dúas visitas ao viveiro de empresas de Costa Vella e tres charlas divulgativas a centros de ensino da demarcación sobre fomento do espírito emprededor cooperativo, cofinanciadas pola Xunta de Galicia no marco da Rede Eusumo.
O obxecto das charlas é contribuír ao desenvolvemento das calidades persoais relacionadas co emprendedor desde idades temperás; fomentar as iniciativas emprendedoras desde o ámbito educativo; e informar, sensibilizar e transmitir a opción do autoemprego como una alternativa laboral digna e viable. Ademais, as xornadas están destinadas a transmitir valores empresariais e cooperativos vinculados á economía social, e dar a coñecer as cooperativas e sociedades laborais como formas xurídicas idóneas para a posta en marcha e desenvolvemento de proxectos empresariais. O persoal técnico da Cámara de Comercio impartirá as charlas divulgativas nos centros escolares e dirixirá as visitas ao viveiro de empresas cameral, situado no número 40 do Polígono de Costa Vella.
Un técnico da Cámara visitará o IES Xelmírez II de Santiago mañá martes, día 25, ás 10:30 horas, para ofrecer unha charla para un grupo de vinte alumnos de 4º da ESO. Ese mesmo martes, un grupo de vinte e dous alumnos do EFA Piñeiral de Arzúa visitará as instalacións da incubadora empresarial ás 10:00 horas. O mércores 26 dezaoito alumnos e alumnas de 1º de Bacharelato do Colexio Alca de Ames escoitarán no seu centro as directrices sobre emprendemento da Cámara de Comercio, ás 11:30 horas. Finalmente, a semana pecharase o xoves 27 con dúas actividades, unha xornada divulgativa no IES Xelmírez I de Santiago con vinte estudantes de 1º de Bacharelato ás 9:30 horas, e unha visita guiada ao viveiro de empresas para un grupo de corenta e cinco estudantes do ciclo superior de administrativo e de 1º de Bacharelato do IES Macías O Namorado de Padrón, ás12:15 horas.
